Першы ў краінах СНД суперхуткі зарадны комплекс адкрыўся ў Мінску ў мікрараёне Брылевічы па адрасе вул. Напалеона Орды, 6. Ён яднае ў сабе месца для зарадкі электрамабіляў са станцыямі новага тыпу, пост для зарадкі электробусаў, сістэму запашання, модуль дынамічнага размеркавання магутнасці і краму аўтаномнага гандлю.
На тэрыторыі суперхуткага зараднага комплексу ўсталяваны 8 станцый для зарадкі электрамабіляў: 7 магутнасцю 100 кВт і 1 суперхуткая, на 350 кВт. Гэтыя станцыі абсталяваны канектарамі еўрапейскага стандарта CCS Combo2 і CHAdeMO.
Адначасна тут зможа зараджацца 8 электрамабіляў, а з дапамогай суперхуткай зарадкі ўласнікі электракара змогуць зарадзіць свой аўтамабіль за 10 хвілін з запасам ходу каля 300 кіламетраў.
На тэрыторыі комплексу ўсталявана станцыя зарадкі электробусаў пантографнага тыпу, зарадны модуль якой знаходзіцца ў прыярытэце: пры падлучэнні транспартнага сродку на яго будзе забяспечана выдача магутнасці не меней за 350 кВт. Астатняя магутнасць у 350 кВт падзяляецца паміж іншымі 8 зараднымі модулямі для электрамабіляў сумерна запытанай імі магутнасці па рэшткавым прынцыпе.
Сістэма запашання электрычнай энергіі дазваляе акумуляваць энергію і зніжае нагрузку на энергасістэму ў сама розрух. Сістэма запашання, аўтаматыка кіравання і праграмнае забеспячэнне комплексу распрацаваны ў Беларусі. У прыватнасці, софт па кіраванні зараднай інфраструктурай распрацаваны ПА «Беларуснафту», а праграмнае забеспячэнне па кіраванні дынамічным размеркаваннем магутнасці – BKM Holding.
Фішкай суперхуткага зараднага комплексу стала аўтаномная крама, якая працуе па прынцыпе Amazon Go.
Першы ўнікальны для нашай краіны і блізкага замежжа зарадны комплекс дазволіць адначасна абслугоўваць электробусы і электракары, а ўвесь працэс будзе займаць не больш часу, чым на звычайнай АЗС.
